Посета на Архиепископот Волокoламски Иларион на Света Гора (11.08.2009)
Со големо велелепие на Света Гора беше прославена славата на манастирот свети Пантелејмон во чест на светиот великомаченик и исцелител Пантелејмон.
Во саботата, на 8. август беше отслужено бдение, кое започна во 20.00 часот и траеше до 8 часот наутро.
Со Литургијата началствуваше Архиепископот Волоколамски г. Иларион, во сослужение на Архиепископот Сергиево Посатски г. Теогност и Епископот Бомбруски и Биховски г. Серафим. Присуствуваа и цивилниот Управител на Света Гора г. Аристис Касмироглу, конзулот на Русија во Солун г. Михаил Хотиненко, јавниот обвинител на Руската Федерација г. Чајка, како и претставници на полицијата и на поморската стража.
По завршувањето на Литургијата беше направена литија со моштите на светиот Пантелејмон, околу соборниот храм на манастирот.
Архиепископот Иларион ја прочита на руски и на грчки јазик честитката од Патријархот Московски и на цела Русија Кирил. А, обраќајќи им се на илјадниците верници, нагласи: „Манастирот на свети Пантелејмон претставува дел на Света Русија, како и Украина, Белорусија и други земји кои го сочинуваат истиот духовен простор".
Исто така г. Иларион се осврна и на денешното евангелско зачало „нова заповед ви давам да се љубите едни со други“, нагласувајќи ја важноста на оваа заповед во животот на монасите, но и на лаиците.
„Ако ние коишто сме монаси не ја пазиме оваа заповед, тогаш излишно е да очекуваме да ја пазат лаиците“, нагласи во продолжение Архиепископот Иларион.
Архиепископот Иларион му подари на манастирот икона на светиот Пантелејмон, нагласувајќи дека „таа икона е изработена во Русија и е дар на еден благочестив бизнисмен, којшто се наоѓа помеѓу нас“.
На крај, г. Иларион откако се осврна на долгогодишната, над 30-годишна, служба на Игуменот на манастирот Архимандритот Јеремија, му подари надграден крст, нагласувајќи: „Возљубен о. Јеремија примете го овој надграден крст, кој е изработен во работилниците на Московската Патријаршија. Се надевам дека ќе го стоплува вашето срце и дека постојано ќе ве поткрепува во вршењето на вашата возвишена служба“.
Извор: Romfea.gr
