Со изградба на цркви против економската криза (19.06.2010)
Романската Православна Црква ги повика властите да помогнат во изградбата на нови цркви, со што ќе се надмине економската криза и ќе им се помогне на верните во борбата со очајанието.
„Продолжувањето со работата на црквите во изградба и подигнувањето на нови цркви ќе помогне да се надмине кризата, како моралната и духовната, така и економската и финансиската“, се вели во соопштението на Романската Патријаршија кое е објавено во четврток на 13 мај.
Вака „ќе се создадат нови работни места и ќе се поттикне солидарноста меѓу луѓето, со што ќе се задуши индивидуализмот и ќе им се помогне на верниците да го одбегнат очајанието“, се вели во соопштението коешто е издадено после критика на властите во медиумите заради одлуката голем дел од буџетот да се додели за изградба на цркви, а истовремено да се намалат платите и пензиите за 15-25% во државниот сектор.
Неодамнешното истражување покажа дека од падот на комунизмот во 1989 година, во Романија се подигнати околу 4000 цркви, додека бројот на училишта е повеќе од преполовен.
Околу 19,5 милиони Романци, од вкупната популација од 21,5 милиони, на последниот попис се изјаснија како православни христијани.
