За обожението (07.02.2013)
На Ликот (Образот, односно Бога) да Му го дадеме создаденото според Ликот, да го спознаеме своето достоинство, да Го почитуваме Прволикот, да ја разбереме силата на Тајните; и тоа за кого умре Христос. Да станеме како Христос, зашто и Тој стана како нас; благодарејќи Му да станеме богови, затоа што и Тој стана човек како нас. Тој го прими лошото за да ни даде подобро; осиромаши за ние да се збогатиме со Неговата сиромаштија; прими изглед на слуга за ние да добиеме слобода; се спушти за ние да се качиме; беше искушуван за ние да победиме; беше обесчестен за ние да се прославиме; умре за ние да се спасиме... Човекот нека даде сѐ, сите плодови како дар на Оној Кој Себеси се даде како откуп и размена; ниеден дар не се споредува со тоа, човекот самиот да Му се дарува на Бога, познавајќи ја силата на Тајните и заради Христос станувајќи сѐ она што Тој стана заради нас.
По патишта тесни и тешки, преку тесна
И за многу непроодна врата, во славна придружба
Христос ме води кон Бога, мене – богот, од земја создадениот
Мене, кој од смртен станав бесмртен.
Заедно со големиот Божји образ, Тој го привлекува и телото, мојот помошник,
Слично како што каменот магнет го привлекува црното железо.
Ние, со големите Божји и пророчки книги
И помошта на боговдахнатите ученици на Христос Застапникот,
Умот кој беше изострен со Духот светлозрачен
И кој со чистото срце големиот Бог Го виде,
Бидејќи тоа е единствениот начин да се сфати невидливото Божество,
Ние го познавме Божјото, станавме богопросветлени, сѐ повеќе стремејќи се,
Колку што е можно за минливите суштества, во овој живот да се возвисат кон Бога.
Затоа што, не е лесно со очите да се види низ облак,
Дури и за најостриот вид.
Но ќе стане можно, само подоцна,
Бидејќи наградата за желбата се содржи во достигнувањето на посакуваното.
Свети Григориј Богослов
