Календар, житија, пости
 

 

Православен календар за 29/06/2024

Календар, житија, пости
Почеток
 
 

Свети Тихон, епископ Аматунтски

Чудотворец. По смртта на блажениот Мемнониј, Тихон беше едногласно избран за епископ на епархијата Аматунтска, а го посвети славниот Епифаниј. За овој чин го препорачаа неговиот чист живот и големата ревност за Православието. Во тоа време уште имаше незнабожци на островот Кипар. Свети Тихон вложи апостолски труд за да ги обрати неверните во верни. И имаше во тоа време голем успех. По долгите подвизи на лозјето Господово, се пресели во блажената вечност, околу 425 година. Наречен е Чудотворец заради големиот број чуда што ги направи за време на животот. Татко му беше пекар. Кога и да го оставеше во дуќанот, тој им го раздаваше лебот на сиромасите. Еднаш татко му го укори за тоа. А тој се помоли на Бога и житницата им се наполни со жито, така што со мака ја отворија. Другпат пак, засади суви прачки во лозјето, но од нив зазелене лоза и во свое време донесе плод.

Тропар
Како младенец возљубувајќи ја чистота, срцето во Христови раце го предаде, Тихоне Божји угодниче, благодатта накалемувајќи се на тебе, сувото лозје во градина Господова го претвори, о ти кој послужи да се срушат заблудите демонски, моли се, Христов епископе, вистината да ја запазиме, пред Жртвата да се поклониме, и преку Неа да се спасиме.

Светите маченици Тигриј и Евтропиј

Двајцата беа од клирот на Св. Јован Златоуст. Кога злобните луѓе го протераа Златоуст од Цариград, се запали соборната црква, а пламенот од неа се крена и падна врз куќите на гонителите на светителот на Црквата. Народот во тоа го виде прстот Божји, а непријателите на Златоуст овој пожар им го припишаа на неговите приврзаници. Многумина од неговите блиски луѓе пострадаа заради овој настан, а меѓу нив и свештеникот Тигриј и чтецот Евтропиј. Градскиот началник, некој некрстен Грк Оптат, со особена злоба подигна хајка на Златоустовците. Во младоста Тигриј беше роб на еден богаташ, којшто го кастрираше. Штом се ослободи од ропството, тој сиот се предаде на служба на Црквата и во таа служба светеше како светол лач. Тој „кроток, смирен, милостив и гостољубив“ човек Оптат го стави на големи маки, па потоа го прати на робија во Месопотамија, каде што во затвор и се упокои. Евтропиј, девственик од раѓање, чист, непорочен и незлоблив, го биеја со воловски жили и стапови и најпосле го обесија. Кога христијаните го понесоа неговото тело за да го погребаат, во воздухот се чу ангелско пеење.

Тропар
Глаголајќи ја устата твоја вистината, свет Евтропие, ближниот не го осуди, а неправдата како награда ја прими, поддржувајќи го Златоуст великиот. Радувај се, мачениче свет, во водите на мирот и за нас моли се од пределите на љубовта.

Кондак
Кроток, смирен, незлобив, те најде раката Христова, а благодатта душата спремајќи ја во служба Негова те приведе, о мачениче Тигрие. Во твоите молитви злобата човечка потона пред Бога, и затоа зза нас сега застапи се од твоето мирно небесно живеалиште.