Божествена Литургија во Рилскиот манастир (27.07.2025 08:37)
Енергетска и сигнална шизофренија
Нашето духовно срце е благодатен центар на нашите лични средби, како и примопредавател на сите лични комуникациски, енергетски сигнали. Затоа не треба да си дозволиме да влеземе во енергетска и сигнална шизофренија.
Ќе се обидам преку еден пример да го објаснам тоа. Кога некој ќе нѐ повреди – без оглед дали навистина или така ни се чини, ние даваме погрешни енергетски сигнали, ако тој – другиот, го сметаме за виновен, а на Бог Му се молиме само нас да нѐ помилува, да ни помогне или уште полошо, тој – другиот да го казни. Во таков случај, енергијата не ни е собрана во или кон нашето срце – кон Бог, туку ни е расеана и поделена: божем, преку молитвата, енергијата ни е насочена кон Бог – негде неодредено, а преку помислите ни е насочена кон оној што го обвинуваме за нашата затемнетост и лошо чувство. Кога тоа ни се случува, ние сме надвор од себе, надвор од нашето срце, надвор од вистинскиот пат, а Бог не ја слуша молитвата на таквите.
Видете колку е многу поинаку кога, преку барањето на Божјата правда, се сметаме себеси одговорни за сѐ. Тогаш, енергијата ни е собрана во или кон нашето срце, затоа што, и сметајќи се самите себе виновни за сѐ, ја насочуваме енергијата кон нашето духовно срце и молејќи се за сите и за себеси, исто така ја насочуваме кон нашето духовно срце. Енергијата на умот не ни е расеана и поделена надвор од нас и надвор од Бог, и Бог ја слуша таквата молитва.
Дали енергијата на умот ни е собрана во нашето срце или кон нашето срце – зависи дали го имаме дарот на умно-срдечната молитва или се трудиме да го добиеме, т.е. се трудиме енергијата молитвено да ја насочиме кон областа на срцето. Има уште многу на темава, ама другпат.
Митрополит Струмички Наум
