Чествување на Свети Наум на Попова Шапка (06.07.2009)
Во петокот на 03. 07. 2009 лето Господово на празникот посветен во чест и спомен на Преподобен Наум Охридски – Чудотворец, во истоимениот манастирски комплекс на Попова Шапка величенствено и со досега незапаметена масовна посетеност беше одбележан патронот на манастирскиот комплекс.
По тој повод надлежниот епархиски архиереј Неговото Високопреосвештенство Митрополитот Полошко – кумановски г. Кирил во сослужение со свештенослужители од Тетовското и од Гостиварското архиерејско намесништво отслужи Света божествена архиерејска Литургија на Свети Јован Златоуст.Воедно на оваа Света архиерејска Литургија од страна на Неговото Високопреосвештенство Митрополитот г. Кирил, беше извршена и хиротонија во ѓаконски чин на свршениот богослов и теолог г. Ивица Трендевски од Куманово. На оваа Света божествена архиерејска Литургија по традиција настапи реномираниот женски младински хор „ Менада “ од Тетово под диригентство на маестро д-р Ивица Зориќ.
Неговото Високопреосвештенство Митрополитот Полошко – кумановски г. Кирил во своето обраќање кон својата паства меѓу другото рече:
„Господи, нека е благословено твоето име од сега и до века за и ние и нашиот благороден народ, нашата родна и мила татковина суверена Македонија, како и нашата афтокефална Светиклиментова Македонска православна црква да векуваме заедно со вечно живиот пред Бога Свети Наум Охридски – Чудотворец чиј патронен празничен ден денес го чествуваме.
Каде што го има Бога таму има и слога, каде што има слога таму го има и Бога! И навистина убаво е како браќа и сестри во Бога, кога ќе се договориме и она што ќе се договориме да го исполниме. А ако не сме во состојба да го исполниме тогаш како христијани не треба да ветуваме. Кога ќе се создадат можности и услови тогаш ќе ветиме и тогаш ќе исполниме. Старозаветниот цар и пророк Давид импресиониран од ваквата глетка како што ние ја доживуваме наоѓајќи се на овој македонски вознес извикал: има ли нешто поубаво и попрекрасно од тоа кога браќата по крв и по вера живеат во мир, слога и љубов. И навистина нема! Љубовта која што Господ ни ја дарувал како на христијани треба постојано да ја преточуваме како дар Божји кон сите со кои што се сретнуваме во нашето секојдневие, особено кон рожбите кои што Господ ни ги дарува, кон нашите роднини, блиски и пријатели и кон сите луѓе. Денес го чествуваме летен Свети Наум Охридски – Чудотворец. Со најголем пиетет Ќе се поклониме пред неговиот ангелски лик, пред неговото огромно епохално дело за неговиот бесмртен подвиг за време на таканаречениот златен период од нашиот многустолетен опстој на просторот од родна и мила Македонија. Свети Наум живеел во деветиот век, а се претставил пред Бога кога се исполнило времето во 910 година. Неговите целебни свети мошти почиваат во неговиот манастир на најјужниот брег на бисерното Охридско езеро “. Свети Наум бил еден од седмочислениците и основоположник на киновитското монаштво во Македонија“.
Исто така Митрополитот г. Кирил во оваа прилика на свијата паства, посебно на најмладите им ги пренесе пораките на САС на МПЦ да го исполнуваат Божјиот благослов и дар формирајќи многудетни семејства, повторувајќи уште еднаш дека две деца се малку, три не се многу, а четири се доволно. Исто така Митрополитот г. Кирил во оваа прилика го пренесе ставот на САС на МПЦ и категорично го осуди стапувањето во истополов хомосексуален брак.
Манастирското чествување на Попова Шапка и во изминатите неколку години бележело масовна посетеност, но бројот на верници што овојпат го посети манастирот „ Свети Наум “ на Попова Шапка беше воодушевувачки и незапаметен по 2001 година. Според нашите проценки преку шестотини верници и почитувачи на ликот и делото на овој наш светител и голем чудотворец во потокот се поклонија пред неговиот светителски лик во светиот Божји храм посветен во негова чест и спомен и изграден на највеличенствениот рид на Попова Шапка на 2000 метри надморска височина. Посетители имаше од повеќе краеви на нашата родна и мила Македонија. Од хотелот Попова Шапка кој се наоѓа во непосредна близина на манастирот, на Свети Наум му се поклонија голем број верници од Битола. Со организиран превоз на тој светол ден на Попова Шапка со неколку автобуси пристигнаа верници од Скопје, а секако импозантна беше бријката и на верниците кои пристигнаа од Тетово и тетовско, за кои превозот беше организиран, како и верници од Гостивар.Неизоставно и оваа година манастирскиот комплекс „ Свети Наум Охридски – Чудотворец “ на Попова Шапка го посетија и нашите иселеници од демократските САД предводени од г. Тврде Стамески, кој на јавното наддавање за иконата на Свети Наум дарува 200 ЕУРА.
Манастирското Настојателство по пат на донации и со помош на АРМ за сите присутни обезбеди заедничка посна братска и сестринска трпеза на љубовта.
По Светата божествена архиерејска Литургија беше извршено режење на кумскиот славски колач принесен од кумовите Жаклина и Миле Србиноски од с. Брвеницa.
Потоа сите верници ја посетиа детската ликовна изложба составена од цртежи со православни верски мотиви направени за време на часовите по веронаука. Свој настап на ова чествување имаа и КУД „ Извор“ с. Јегуновце и КУД „ Вардар “ од с. Брвеница.
За манастирскиот комплекс кој е под дирекно управување на Неговот Високопреосвештенство Митрополитот г. Кирил се грижи Манастирско Настојателство кое неуморно и самопожртвувано работи на негова целосна доградба според првичните планови. Оваа година Манастирското Настојателство по пат на донации од благочестиви верници и моќни институции успеа да обезбеди финансиски средства со кои на целиот манастирски конак кој зафаќа површина од 1000 мерти квадратни постави врати и прозорци, ги доѕида сидарски недовршените делови и ги поправи местата оштетени од суровите шарпланински снежни невремиња, го поправи манастирскиот кров и постави иберцуг маса на подот на приземјето, започна со изградба на фасадата и уште многу нешта.Воодушевувачка глетка на најубавиот рид на Попова Шапка создаваат едно до друго развеаните знамина на нашата родна и мила татковина Р. Македокија и на нашата Светоклиментова Македонска православна црква поставени на високи јарболи.
Со најискрена благодарност од целото Манастирско Настојателство, а и од сите верни чеда мораме да истакнеме дека досега убедливо најголем донатор за доградба на манастирскиот комплекс „ Свети Наум Охридски – Чудотворец “ на Попова Шапка кој со својата смелост и дарежливо срце ја воодушеви својата паства и воопшто целата јавност во Тетово и пошироко е токму Неговото Високопреосвештенство Митрополитот Полошко кумановски г. Кирил. Дарувањата на Митрополитот г. Кирил кон манастирскиот комплекс на Попова Шапка се големи од нив некои веќе се реализирани. Тој за време на чествувањето на зимскиот патронен празник на манастирот пред целата своја паства вети финансиска донација во висина од 10. 000 ЕУРА од кои половината веќе се реализирани. Овојпат воодушевен од постигнатите градбени резултати пред сите верници вети дополнителни 5. 000 ЕУРА финансиска помош. Само пред две недели Неговото Високопреосвештенство Митрополитот Полошко – кумановски г. Кирил за потребите манастирскиот комплекс донираше комплетна и со висок квалитет росвај индустриска кујна, фрижидер сандучар и кабинетски инвентар, кој во моментот е сместен во манастирскиот комплекс во Лешочкиот манастир, како и комплетен кујнски инвентар за преку сто лица наменет за манастирските потреби.
За голем пример и пофалба е и донацијата на а. д „ ЕЛЕМ “ – Скопје, кои за доградба на манастирскиот конак донираа 5. 000 ЕУРЕ. Како и многу други приватни стопанственици.
Попова Шапка како величенствено Божјо создание како и секогаш плени со својата убавона. Особено освежувачка глетка на неа создаваат сеуште неистопените снежни навеви кои по се изгледа ќе го дочекаат Петровден. Па затоа и шарпланинските денови се со променлива клима, но воглавно повеќе се задржува сончевото време. Но затоа пак шарпланинските ноќи се поудобни покрај пламените јазици на каминот. Во моментот на Попова Шапка најинтересни се прошетките по живописните падини, како и бербата на планинскиот чај, а наскоро ќе стасаат и планинската шумска јагода, како и боровинките. Дарежливата Божја рака на Попова Шапка дарувала се за секого и според сечиј вкус, во секој период од годината и затоа препорачуваме дека Попова Шапка ја заслужува и Вашата посета.
ГО КОРИСТИМЕ ОВОЈ ПРОСТОР И ДА АПЕЛИРАМЕ ДО БЛАГОЧЕСТИВИТЕ ВЕРНИЦИ СО СВОИТЕ ШТЕДРИ ДОНИРАЊА ДА ЈА ПОМОГНАТ ДОГРАДБАТА НА МАНАСТИРСКИОТ КОМПЛЕКС „ СВЕТИ НАУМ ОХРИДСКИ – ЧУДОТВОРЕЦ “ НА ПОПОВА ШАПКА.
ЗАИНТЕРЕСИРАНИТЕ ВЕРНИЦИ ТОА МОЖАТ ДА ГО СТОРАТ НА СЛЕДНАТА ЖИРО СМЕТКА: ТТК БАНКА 290 – 4000001986 – 87.
НАПОМЕНУВАМЕ ДЕКА ИМИЊАТА НА ДОНАТОРИТЕ ЌЕ БИДАТ ЗАПИШАНИ ВО ГОЛЕМИОТ ДОНАТОРСКИ ДНЕВНИК НА МАНАСТИРОТ И ТИЕ ЌЕ СЕ ПАМЕТАТ ВЕЧНО!
Подготвил:
свештеник Жарко Мицковски, старешина на манастирот
