Vesti i nastani
 
 
 
 
 

Божествена Литургија во чест на успението на Преподобниот Јован Шангајски (02.07.2004)

 

Денес, кога го славиме празникот на

Светиот апостол Јуда, и на

Преподобниот Паисиј Велики, и го споменуваме

успението на Преподобниот Јован Шангајски,

во манастирот на Свети Николај Мирликиски Чудотворец

во Љубанци (на Скопска Црна Гора)

Божествена Литругија отслужи

Струмичкиот Митрополит г.Наум.

 

 

                     

                   црквата на Свети Николај во Љубанци

 

Црквата во Македонија во најсветол спомен го чува шестгодишниот престој и подвиг на Преподобниот Јован во овие краишта (во богословијата во Битола, во манастирот на Пресвета Богородица во Трескавец ...), и често го нарекува Свети Јован Битолски. Сведоштвата на неговите ученици од битолската богословија кажуваат дека посветувал необично штедра лична и молитвена старателска љубов кон нив. Божествена Литургија служел секојдневно. Се памети дека со себе секогаш ги имал иконите на Свети Јован Крстител и на Преподобниот Наум Охридски.

Осведочен во чудотворните молитви на Преподбниот Наум, неговата икона ја положувал врз болните кога им читал молитви за исцеление.

А познат е по неговото безусловно човекољубие кон болните луѓе, кои и денес во своите молитви не ги остава, и им подарува исцеленија на сите што со вера го повикуваат за застапник кај Бога.

Од Битола, каде што подвижнички живееше како јеромонах и учител, замина по повик заради хиротонија и стана епископ Шангајски. Натаму патот на Преподобниот Јован значи апостолска мисија во освојување на духовен простор кај модерните луѓе во новите континенти и кај припадници на субкултури во голема мера оддалечени од христијанството.

Се упокои на денот спроти празникот на Свети Наум, 1966 година, после Божествената Литургија што ја отслужи во црквата на Свети Николај во Сиетл. А беше погребан на денот на Раѓањето на Свети Јован Крстител.

Во мај 1993 година Архиерејскиот Собор на Руската Задгранична Црква во Ленсинскиот манастир во Франција по исцрпна истрага за светоста на Преподобниот, донесе одлука да биде канонизиран за Светител. Канонизиран е на 19 јуни (2 јули) 1994 година (и оттогаш неговиот спомен се слави на денот на неговото успение).

По неговите свети молитви Господ да нѐ милува и заштитува секогаш. Амин.